Friday 29th of March 2024 Sahafi.jo | Ammanxchange.com

المواضيع الأكثر قراءة

 
  • آخر تحديث
    12-Jun-2017

تأثر إقليمي - احمد حسن الزعبي
 
الراي - لأنه يدرك أن أصعب ساعات الصيام هي الساعات الأخيرة فهي تمر بطيئة وثقيلة وعظام الرقبة تزمّر إيذانا بأن»البطارية توشك على النفاد» يحاول أبو يحيى أن يشغل نفسه بأي وسيلة كانت ،مرة يقوم بتقطيع «خيطان المصّيص» بمقاسات متساوية بطول ذراعه استعداداً للحصيدة رغم انه لم يزرع أرضه هذه السنة ، ومرة يحاول أن يحرق العشب اليابس خلف السياج الغربي ،ومرّة يبحث في الحاصل الطافح بالكراكيش عن «فيش مكوى»..كل ذلك في سبيل إضاعة الساعة الأخيرة من النهار..
 
أمس نزل أبو يحيى إلى الحاكورة في جولة تفقدية للأشجار ،لاحظ أن حبّات قليلة من الرمان العجر قطفت ورميت على التراب، كما أن أحد أغصان الخوخة مكسور وورقه الأخضر يميل إلى النشاف ، وثمة عناقيد من العنب «الحصرم» منثورة تحت الدالية ،استشاط غضباً ووقف ينادي على شقيقه زكريا بغضب..خرج الأخير بالسروال الأبيض والفانيلا من بيته ليرى ما الذي حدث..
 
- أبو يحيى: يعني أميت أولادك بدهم يخجلوا ع حالهم ويبطلوا يفوتوا ع الحاكورة ،الرمان مقطعينه ،العنب الحصرم مرمي تع شوفه ، وكاسرين الخوخة..وسارقين زغلول من الطواقي ! يا زكريا والله والله المرة الجاية لأفلخهم فلختين!.
 
- زكريا: اسمع حجي..أولادي ما طلعوا من الدار اليوم ،هظول اولادك شايش وشلاش لا تكب بلاك علينا ساعة هالمغرب!
 
- أبو يحيى: كل الخراب بيجي من تلا السنسلة الهايلة .. بنطّوا عنها وبفوتوا ..مليون مرة قلت لك قهقهر هالـ».....» وكافينا شرّك يا رجل..
 
- زكريا: السنسلة هايلة من عشرين سنة ..هسع تذكرتها؟..كمان مين اللي بينط عنها بالشتوية وبيجي يتعلل عندي مش انت.. لا تطرفش بالحكي!.
 
- أبو يحيى: اني بطرفش بالحكي..بورجيك..
 
قام أبو يحيى بإحضار باب حديدي كبير وأغلق الثغرة في السنسلة ، ثم بدأ يرمي الحجار الكبيرة في محاولة منه إلى إغلاق الدخلة الوحيدة المؤدية إلى بيت زكريا..ثم أغلق «المعبور» الصغير الفاصل بين البيتين بــ»الزرّيقية»...وعاد إلى بيته يلهث:
 
يا مرة يا أولاد لدّوا جاي..من اليوم وطالع قطعنا العلاقات مع عمكو زكريا لأنه مش مخليها باللايق ،من هسع تسكير كل المنافذ والأبواب والدخلات ،وتسكير بيت الدرج المشترك وممنوع ينشروا غسيلهم بمجالنا الجوي ... وأولاده كلهم حطيتهم على قائمة التخريب والإرهاب ، وإنت يا ام يحيى لازم «لس بّد» مغادرة طواسيهم وطناجرهم من بيتنا خلال 24 ساعة..واحكوا مع اخوي رضوان خليه يعمل زينا ،ومع أختي صيته خليها تقطع معه إذا ما بدها ترى ما في عيديه السنة هيك خبروها..أو خليها تخفض التمثيل الدبلوماسي وتظلهاش ختي متي تتفطّر عنده وتتسحّر عنده...
 
آخر شي..يحيى يابا: قوم اشلع صحن الستلايت تبعهم واقطع سلك الانترنت اللي مار من ظهر حيطنا..مشان ما يكتبوا أولاده عصفحاتهم مسبات علينا..وخلينا نشوف زكريا شو بده يطلع بيده!